NSF-in ILP khauh taka kalpui phut

Assam sorkarin National Registry of Citizens (NRC) final list a tihchhuahah mi nuai 19 chuang zet an tel lo. Hei vang hian list-a tellote hi Assam aṭanga an state-a an tlanchhiat mai vengthawngin, Naga Students' Federation (NSF) chuan state sorkar hnenah dan loa lutte venna turin Inner Line Permit (ILP) system chu khauh taka kalpui turin an phut. 

NSF president Ninoto Awomi leh general secretary Liremo R Kikon chuan dan loa lutte venna kawngah sorkar chu Dimapur district-ah hma a la ṭha tawk lo tih an sawi. Bengal Eastern Frontier Regulation (BEFR) 1873 kenkawh ṭhat tawk loh vang leh, ILP-in Dimapur district a huam tel ve loh avangin he district-ah hian dan loa pemlutte an lut nasa hle tih an sawi. 

Dimapur district kaltlanga dan loa pem luh an tam avangin Naga leilung fate chu hnamdangte an chimral mai a hlauhthawnawm tih an sawi a ni. Hei vang hian Dimapur district-a ILP hman a nih ve theihna turin sorkar chu chak taka hma la turin an phut. 

Zirlai pawl chuan checkgate zawng zawngah ILP system chu khauh taka kalpui an phut tih sawiin, Naga mipuite pawh ramdang mi, dan loa lut turte venna kawngah theihtawp chhuah turin an sawm bawk.