Manipur-a school hawn ṭan niah zirlai kal an tlem

Manipur-ah Nilaini aṭang khan Class 9 leh a chung lamte tan school hawngin, zirna an chhunzawm ṭan a, mahse school hawn ṭan ni hian zirlai kal an ṭha lo hle. 

Hripui leng vangin kum khat dawn chu zirna-inte hi khar a ni a, school hawn a nih pawhin zirlaite chu nu leh paten remtihnaa kal tura tih an ni a, mahse nu leh pa tam tak chuan an fate school kal tir hi an la hreh a ni. 

Sorkarin hri leng laka invenna tura kaihhruaina a siam angin school-te hi hawn a ni a, class room pakhatah ṭum khatah zirlai 30 aia tam an awm phal a ni lo a, social distancing dan chu zawm tura tih an ni. Classroom an luh hmain zirlaite document-te enfiah vek a ni a, zirlaite hian nu leh paten school kal remtihna an ziahte an ken tel a ngai a ni. Zirtirtute chuan face shield an hmang a, an zirtir laiin classroom chhungah an tei kual a rem lo a, hmun pakhat aṭangin zirtirna hi an pe tur tih a ni.