Manipur sorkarin tualchhung siam zu zawrh phal dawn

Manipur sorkar chuan an state-ah tualchhunga siam zu, distilled in­digenous country (DIC) liquor zawrh a phal dawn a, hemi atan hian ruahmanna a kalpui mek. 

Deputy chief minister Y Joykumar kaihhruaia select committee din chuan Nilaini khan Imphal West district-a Sekmai Awang Leikai leh Phayeng hmuna DIC liquor siamna hmunte an tlawh.  Team hian tualchhunga siam zu chu a thianghlim tawk em tihte an enfiah a ni. 

Dy CM chuan DIC liquor chu Manipuri custom leh culture-a tel tlat a ni tih sawiin, tualchhung mi eng emaw zatin sum lakluhna atan an hmang bawk tih a sawi. Mahse hetichung hian ram dang siam zu lakluh a la ni reng tih a sawi a, DIC liquor-te chu state pawn lama thawnchhuah theih dan kawng pawh an ngaihtuah dawn tih a sawi bawk. 

Joykumar chuan Selection Committee chuan  Manipur Liquor Prohibition (Second Amendment) Bill, 2018 chungchang  sawihoin, mipui ngaihdan pawh lak an tum tih a sawi. January 22-a state assembly-ah khan Selection Committee in Prohibition Bill  hi a zirchiang mek tih sawilan a lo ni tawh a ni. He bill-ah hian state chhunga zu siamte chu state pawn lama hralh chhuak tura rawtna siam a ni. 

Hetih lai hian Coalition Against Drugs and Alcohol (CADA) chuan thuchhuah siamin, Manipur sorkar chu zu zawrh phal lo turin a ngen. CADA chuan kum 1970 chho aṭang khan Manipur-ah zu in an pung nasa tih sawiin, hei vang hian mi tam tak tawrhna a thleng tawh tih a ni, an ti.