Article 371 tihbo tumna a awm lo : Amit Shah

Arunachal Pradesh Statehood day lawmna hmanpuitu, union home minister Amit Shah chuan sorkar laipuiin hmarchhak state-te special status pekna, Article 371 tihbo tumna a nei lo tih a sawi. 

Home minister chuan nikum August 5-a Jammu and Kashmir special status pekna, Article 370 tihtawp a nih hnu khan hmarchhak biala hman mek, Article 371 pawh sorkar laipuiin a titawp ve dawn niin thu dik lo thehdarh a nih thu a sawi. Hetianga thu dik lo thehdarhtute chu an thil tumah an hlawhtling dawn lo a ni, a ti. 

Ningania Itanagar-a Arunachal Pradesh State­hood Day vawi 34-na lawmnaa thu a sawiah, Amit Shah chuan, "Aruna­chal Pradesh leh Mizoram-ten an state day an lawmna pualin hmarchhak bial pum chu Article 371 tihtawp a ni dawn lo tih ka hrilh chiang nghal duh a ni. He Article tihtawp tumna hi a awm lo," a ti. 

Amit Shah chuan hmarchhak state hrang hrangte harsatna neih chu kum 2024 inthlanpui neih hma ngeia tihtawp vek a tiam bawk. Hmarchhak state hrang hrangten ramri chungchang, hnam bil kaihhnawih thil, helna leh thil dang dang vanga buaina an neihte chu sorkar laipui chuan chinfel sak ngei tumin theihtawp a chhuah mek a, "Prime minister Narendra Modi chuan hmarchhak bial pum chu buaina awm lohna hmuna siam a duh a ni," a ti. 

Shah chuan hmarchhak hrang hrang khawpuite chu kum 2021 hmain kawngpui leh boruak-ah inthlunzawm tir hman vek an tum tih a sawi. Aruna­chal Pradesh-ah airport siam mek a ni a, hei bakah hian state chhunga kawngpui siamna atan sorkar laipui chuan cheng vaibelchhe 50,000 a hmang tawh bawk tih a sawi.  

PM Modi kaihhruai sorkar laipui chuan hmar­chhak bial hma­sawnna tur chu a ngai pawimawh a, kum thum liam ta chhung khan hmarchhak biala  National Highway, km 3,800-a thui siam nan cheng vaibelchhe 32,000 a hmang a, he kawng siam mekah km 1,200 a thui chu zawhfel a ni tawh bawk a ni, a ti.