Assam Accord clause 6 HLC chairman atana ruat bang
Union Cabinet in tun thla tira a lo pawm tawh anga Home Ministry in Assam Accord clause 6 kalpui a nihna tura High Level Committee dina Chairman atana a ruat M P Bezbaruah chu a bang ve leh.
Union Cabinet hian January 2 khan Prime Minister Narendra Modi kaihhruaina hnuaiah Assam Accord clause 6 kalpuina tur atana HLC din a remti a, hemi hnu hian Home Ministry chuan member 9 awmna committee a din nghal a ni. Mahse Home Ministry in committee member atana a ruat palite chuan kar liamta Ningani khan ruat an nihna hi an pawm loh thu an sawi a, tunah hian chairman atana ruat M P Bezbaruah pawh hian ruat a nihna hi a pawm lo ve leh a ni.
Ninagni khan Asom Sahitya Sabha president hlui ve ve, Nagen Saikia leh Rong Bong Terang, Journalist senior leh The Sentinel editor hlui Dhirendra Nath Bezbaruah leh All Assam Students Union (AASU)-te chuan committee member tura ruatna hi an hnawl tih an sawi.
Bezbaruah chuan a ban chhan chu Home Ministry hnenah pawh a hriattir tawh thu sawiin civil society aiawhte berin committee-a tel an duh loh vang a nih thu a sawi. Committee kaihruaitu ber nih a, civil society aiawh an awm leh si loh chuan a tan awmzia a awm lo tih a sawi bawk.
Bezbaruah hmaa member pali bangte hi Citizenship Amendment Bill an duh loh vanga bang an ni ber a, bill hi Assam tana thil hlauhawmah an ngai a ni.
HLC secretary atan hian home ministry joint secretary chu ruat a ni bawk.