Arunachal Assembly in-thlan atan NPP inruahman

Arunachal Pradesh Assembly inthlan awm tur atan National People’s Party (NPP)-te chuan an inruahman ṭan thu sawiin seat tam thei ang berah candidate dah an tum thu an sawi.

NPP chuan thawhpui neih an tum loh thu an sawi bawk.

NPP national president leh Megha­laya Chief Minister ni bawk, Conrad K Sangma chuan NPP state executive meeting an neih zawh hnuah Arunachal Pradesh inthlanah an chuh ve ngei dawn thu leh seat tam thei ang ber lak ngei an tum tih a sawi a, candidate pawh tam tak dan an tum tih a sawi a ni.

Arunachal inthlanah an party chu an chet ṭhat ngei a beisei thu sawiin Conrad chuan mi tam takin NPP an thlawp tih a sawi a, NPP candidate tam tak an awm ngei dawn thu leh mipuite hnen aṭanga thlawpna an hmuh chu ropui tak a nih thu a sawi bawk.

NPP hian Arunachal-ah hian MLA pasarih an nei mek a, nikum July thla khan nasa taka hma sawnin People’s Party of Arunachal (PPA) legislator pakua zinga pasarihin an party hi an zawm a ni.

Conrad Sangma chuan AP inthlan awm tur atan hian ruahmanna ṭha zawk an siam tih sawiin block, district leh state level-a ṭhalai, hmeichhia leh an committee hrang hrangte chu an thuamchak dawn tih a sawi.

BJP-te nena an thawhhona NEDA (North East Democratic Alliance) chungchang pawh sawiin NEDA chu thawhhona chungchang an sawina hmun ni lo in hmasawnna, lungrualna leh venhimna chungchanga thil pawimawhte an sawihona ṭhin a nih thu a sawi bawk.