BJP in Citizenship Bill an sut chuan AGP-in an thawhhona ngaihtuah ṭha dawn

Sawisel hlawh tak Citi­zenship Amendment Bill 2016 vanga Asom Gana Parishad (AGP) in Bharatiya Janata Party (BJP) nen an thawhdunna an tihtawp hnuah, AGP hruaitute chuan thuchhuah an siamah BJP in Citizenship Amendment Bill an sut a nih chuan an thawhdunna chungchang pawh an ngaihtuah ṭha leh dawn tih an sawi. 

Assam regional webiste Guwahati Plus in a tarlan danin  AGP leader leh party president ni bawk Atul Bora chuan BJP chuan an thutlukna chu an sut leh a ngaih dawn thu leh an sut a nih chuan hmalam hunah an ennawn leh thei dawn tih a sawi. Tun dinhmunah chuan BJP chet dan engkim chu an thlir reng thu leh party meeting-ah sawiho a ni leh dawn tih a sawi a, an tan chuan thil awmdan chu nghah a thlir mai a ngaih thu sawiin thil awmdan a inthlak a nih chuan party forum-ah an ngaihtuah ṭha leh dawn tih a sawi a ni.

AGP leader hlun Keshab Mahanta pawhin bill chu an sut leh a nih chuan an party chuan thawhdunna chungchang an ngaihtuah ṭha leh dawn tih a sawi ve bawk.

AGP hian January 7 khan BJP nena an thawhdunna hi Citizenship Bill duh loh vangin an titawp tih an sawi a ni.

Seat 126 awmna Assam Assembly-ah hian BJP, AGP leh BPF thawkho hian seat 86 an la a, heng zinga seat 60 hi BJP lak niin AGP hian 14 lain, BPF hian seat 12 an la thung.

Citizenship Amendment Bill hi sawiselna leh dodalna tam tak karah kar liamta Thawhlehni khan Lok Sabha chuan a pawm a, hemi avang hian hmarchhak hmun hrang hrangah pawl tam takin duh lohna an lantir zui a ni.

He bill  hnuaiah hian Afghanistan, Bangladesh leh Pakistan aṭanga lo lut, muslim ni lo, kum nga awm tling tawhte chu India khua leh tui an ni thei dawn a ni.