Manipur: CBI in police 10 lakah chargesheet thehlut leh

Central Bureau of Investigation (CBI)-a Special Investigation Team (SIT)-te chuan kar kalta Zirtawpni khan Manipur fake encounter case kal zelah police 10 lakah chargesheet an thehlut.

CBI hian Chief Judicial Magis­trate Imphal West Court-ah chargesheet hi thehlutin 2009 fake encounter case kal zelah heng police 10-te lakah hian chargesheet hi an thehlut a ni.

DS Chauhan DSP CBI chuan September 8, 2009-a Manipur Police Commandos leh 12-Maratha Light Infantry (MLI) ṭangkawp ten Imphal West district-a Patsoi police station huamchhung, National Highway-53 hrula Awang Khunou-a beihpui an thlaka mi paruk thah an nih chung­changah police 10 lakah hian charge­sheet hi a thehlut niin thulakna chuan a tarlang,Army, paramilitary leh Manipur polic-te lakah hian fake encouter case 1528 zet ziahluh a ni a, hemi chhuichiang tur hian Supreme Court chuan July 14, 2017 khan CBI chu dahin CBI hian SIT hi an din nghal a ni. CBI hian he thubuaiah hian chargesheet pariat an thehluhna chiah a ni bawk.

CBI hian chargesheet-ah hian police-te leh tualchhung agency-ten an chhuichianna an kalpuiah hian thil fel lo a awm nual tih ziaklangin, police commando-te chuan silaimu 119 an kapchhuak tih an report thu leh 12-MLI-te chuan silaimu 98 an hman thu an report tih an ziak a, hetihlai hian silaimu bawm 12 chiah an inkahna hmun aṭang hian hmuh a ni thung tih an ziak. 

Heng police 10-te lakah hian IPC section 302, 201 leh 34 tlawh­chhana thubuai an thehluh thu sawiin thu zawhfiah tura koh an ṭul thu an ziak bawk a ni.