NPF in mipui rilru hruaikawi an tum: CM Neiphiu Rio

Nationalist Democratic Progressive Party hotu leh Nagaland Chief Minister ni mek Neiphiu Rio chuan eptu party Naga People's Front(NPF) chuan tun hnaia sawisel kai nasa tak Citizenship (Amendment) Bill chungchangah Naga mipuite rilru hruaikawi an tum thu a sawi.

Kum 2016 a he bill ngaih­tuah a nih laia Nagaland a sawrkar siamtu (NPF) chu BJP thawhpui an nih thu a sawi bawk.

Rio chuan, "NPF leh BJP-te hi kum 2016 khan an thawk dun a, Nagaland a sawrkarna siamtu pawh an ni. NPF hian an sawrkar hunlai khan he bill chungchangah hian ngawih an chuh tlat a, an sawisel lo. Tunah theihtawp kan chhuah a, mipuite hruaikawi zawng thu an chhuah ve chauh a ni," tiin Chang Khulei Setshang buat­saih. Poanglüm Mini Hornbill a hmanpuinaah a sawi a ni. 

Rio hian a kaihhruai sawrkar chuan June 5, 2018 leh January 7, 2019-te khan hemi chungchangah hian ṭhutkhawmna an neih tawh thu sawiin Naga mipuite leh Nagaland chu Bengal Eastern Frontier Regulation Act, 1873 leh Inner Line Permit hmanga venhim tlat an nih thu a sawi. "State kan nih theihna turin point pawimawh tak tak 16 a awm a, hemi point zinga clause no.16-ah chuan Inner Line Regulations hi Bengal Eastern Frontier Regulation, 1973, behchhanin Nagaland-ah chuan hman zel tura tih a ni," tiin Citizenship (Amendment) Bill avangin Naga mipuite chu chiai lo turn a chah a ni.