Citizenship Bill chungchangah Rajnath Singh-a'n hmarchhak CM-te hmu dawn

Union Home Minister Rajnath Singh chuan, Citizenship Amendment Bill chungchangah hmarchhak Chief Minister-te meeting a neihpui thuai dawn tih a sawi.

Kar liam ta khan Mani­pur Chief Minister N. Biren Singh leh Assam Chief Minister Sarbananda Sonowal-te chuan a hrang ve ve in an kaihhruaite nen Union Home Minister hi meeting an neihpui a, hemi ṭum pawh hian Union Minister hian hmarchhak CM-te chu Citizenship Bill chungchangah hian meeting a neihpui ngei dawn tih a sawi thu tarlan a ni.

Home Ministry in thu­chhuah an siamah Rajnath Singh chuan hmarchhak state mipuite duhdan, an tihdan phung leh an kalphungte chu venhim a ni dawn tih a sawi thu leh Chief Minister zawng zawng nena meeting a ko dawn tih a sawi thu an tarlang.

Manipur CM Biren Singh, Manipur BJP President leh Rajya Sabha MP ni bawk Ksh. Bhabananda Singh-te chuan Inrinni khan Rajnath Singh hi hmuin Manipur Assembly-in July 23, 2018-a a pawm tawh Manipur People’s (Protection) Bill, 2018 chu President-in a pawm ngei theih nan memorandum an thehlut a ni.

Rajnath Singh chuan bill chu Ministry in an ennawn dawn thu a lo hrilh niin an sawi. 

Kar liamta vek khan Chief Minister Sarbananda Sonowal leh a kaihhruai mi ṭhenkhatte chuan Union Minister hi an hmu ve bawk.

Anni bakah hian Bodoland Territorial Council Chief Hagrama Muhilary pawhin Bodo community venhimna chungchangah kartawp khan Home Minister hi a hmu ve bawk a ni.

Citizenship Bill hi Parlia­ment-in a pawm a nih chuan Afganistan, Pakistan leh Bangladesh mi, India rama kum nga awm tling tawhte chuan India khua leh tui nihna an nei thei dawn a, heihi hmarchhak state hrang hrangte chuan an duh lo hle a, awlsam taka inchimralna tur a ni dawn niin an ngai a ni.