Tripura: Ambulance beih lai video darh Indigenous group-te lungawi lo

North East Students’ Organization (NESO)-te'n kar hmasaThawhlehnia hmarchhak puma bandh an huaihawt ṭuma Tripura a Madhavbari a buaina chhuakah security-te'n mi paruk an kahhliam vanga mipui lungawi lo chuan ziaawm lam a pan dawn lo niin a lang.

Madhavbari buaina chhuakah hian mi 15 velin hliam an tuar a, security mite chuan silai hmetpuakin mi parukin hliam an tuar a nih kha. Hliam tuar zinga pahnih dinhmun hi a ṭha lo hle a, pakhat phei hi chu a awmah silaia kah a nih avangin Kolkata lamah kalpui a ni hial.

Heng mi parukte hi kahhliam an nih hnu hian Ambulance-in Khumulwng a Kherengbar Hospital panpui nghal an ni a, damdawiin panpui an nihna kawngah hian Ambulance hi beih a ni a, heta beih a ni lai video hi a darh zui a ni. 

Video-a a lan dan chuan security mite vek hian Ambulance hi an bei zui a, hei hian Indegenous group-te chu a tilungawi lo hle a ni.

West Tripura district superintendent of police Ajit Singh chuan video-ah chuan police-te'n ambulance an bei ngei em tih a hriatchian theih loh thu sawi thungin, ambulance beih lai a lang lo niin a sawi. Mahse video darh hnu hian Tripura-a indegenous community hrang hrangte chuan an lungawi loh thu an sawi thung.

Royal Scion Pradyot Bikram Manikya Debbarma pawhin thilthleng chu a dem thu sawiin TSR silai hmehpuah chu a dem thu Facebok-ah a post a ni.