Manipur-ah PM leh Governor lim siamchawp hal

Hmarchhak hmun hrang hrangah Citizenship (Amendment) Bill, 2016 duh lohna lantir chhunzawm zel la niin, Pathianni khan Manipur-a Thoubul distrcit-ah chuan Prime Minsiter Naren­dra Modi leh Mani­pur Governor Dr Najma Heptulla-te lim siamchawp chu hal a ni.

Pathianni-a Thoubul district-a Citizenship Bill duh lohna lantirna hi Youth’s Action Commi­ttee for the Protection of Indigenous Peoples (YACPIP) kaihhruaina hnuaia neih niin mi tam tak an tel a, Imphal leh Moreh kalpawhna kawngpui, NH-102-ah kawngzawhin hmeichhe pawl aiawhte, School leh College hrang hrang aiawhte an tel.

Manipur-ah hian Citizenship Bill duh lohna hi zirlai pawl paruk- AMSU, MSF, DESAM, SUK, KSA leh AIMS-te chuan nasa taka lantirin sorkar laipuiin Citizenship (Amendment) Bill 2016, dan a siam an tum chu nasa takin an la dodal reng a ni.

YACPIP hian zirlai pawlten dodalna an lantir hi an thlawp thu sawiin bill pawm chu hmarchhak mite thliarhranna hmanrua bawk a nih thu an sawi.

Pathianni vek hian Imphal East district a Khundrakpam-ah bill duh lohna kawngzawh hi neih a ni a, hetah pawh hian tel an ṭhahnem hle a ni. All India Student Federation (AISF) Manipur State branch chuan BJP president K Bhabananda chu Rajya Sabha aṭanga bang tura an ngiat thu an tlangaupui ve bawk.

AISF State Secretary, Kh Ra­meshwor chuan Pathiannia Imphal a thu a sawinaah Baba­nanda chu bang ngei tura an ngiat thu a sawi. 

AISF hian President hnenah pawh bill chungchangah hian memorandum vawiin hian thehluh an tum bawk a ni.

Manipur CM chuan bill chung­changah hian mipuite chu chiai lo tura ngenin, Sorkar laipuiah bill hian an state a huam lohna turin hma an la dawn tih a sawi ve thung a ni.