Arunachal CM hlui Apang-a'n BJP a chhuahsan

Arunachal Pradesh Chief Minister hlui leh Bharatiya Janata Party(BJP) hruaitu hlun Gegong Apang chuan Thawhlehni khan BJP Party a chhuahsan a, Apang hian a banna lehkhaah BJP chuan Atal Bihari Vajpayee-a zirtirna an zawm tawh loh thu a sawi.

A banna lehkhaah hian Apang chuan, "Tun dinhmuna BJP kal danah hi chuan Vajpayee ziritrna te kha an ngaihthah nasa hle a ni. Thuneihna an tuipui em em a, kan hruaitute  hian thuneihna semzai emaw mipuite duhdana kal an ngai pawimawh lo hrim hrim a ni," tiin BJP a chhuahsan chhan chu party hruaitu ni mekte kal dana a lawm loh vang a nih thu a sawi.

2014 khan Arunachal Pradesh-ah BJP hruaitute chuan phakar takin Chief Minister thi ta Kalikho Pul chu hotu atan dahin Supreme Court-in a remti lo chungin BJP sorkar chu siam a ni tih a sawi bawk. Pul-a inthah chungchangah khan chhuichianna pangngai tak kalpui a ni lo tih sawiin, tuna BJP hruaitute chuan hmarchhaka BJP sorkar dah belh ringawt chu an thupui ber a ni tih a sawi a ni. 

Kum kalta November 10 leh 11 a state level executive co­mmi­ttee meeting Pasighat-a an neih ṭum pawhin BJP General Secretary Ram Madhav chuan member tam tak leh office bearer-te chu an ngaihdan sawi a remti lo a ni, a ti.

Inthlan hmaa CM tura Pema Khandu dah tur thutlukna siam pawh BJP kalphung a ni ngai lo tih sawiin BJP chuan tunhma chuan legislature-te leh party member-te ngaihdan an lak hnuah chiah hruaitu tur thutlukna an siam ṭhin tih a sawi. Hetiang taka democracy kalphung palzutna leh hnawlna hi L.K Advani, Vajpayee, B.S. Shekawat, Kusha­bhau Thakre, Madan Lal Khu­rana, Rajmata Scindia leh Sikandar Bakhl-te hunlai khan a thleng ngai lo tih a sawi bawk.

Hmarchhakin harsatna a tawh hrang hrang -Naga peace talks, Chakma-Hajong chungchang, Amendments of Citizenship Bill, Telecommunications leh real time digital connectivity-te mai bakah ram ṭhenawm Bangladesh, Myanmar leh China-te nena inngeih leh ralmuang taka khawsak ho chu Modi sorkar chuan a la thutak tak tak lo tih a sawi.

Amit Shah leh Prime Minister Narendra Modi-te chu Vajpayee-a zirtirna "Raj Dharna" hre reng tura chahin an hmalakna chuan an chungah ro a relsak dawn tih a sawi a ni.