Meghalaya lungalhthei khur: Chennai-a Underwater robotics team-te'n chhanchhuah hna zawm

Jaintia Hills, Megha­laya a lungalhthei khura tang mi 15-te chhan­chhuah hna chu thawh mek zel la niin, vawiin thleng hian heng mi 15-te chin  hi hriat a la ni lo.

Rat-hole Coal mine tia an sawiah hian nikum December 13 aṭang khan heng mi 15-te hi an tang tawh a, an dam chhuah rin ni tawh lo mah se Supreme Court in thupek a tihchhuahah an thi emaw, an dam emaw lachhuak ngei turin a hriattir a ni.

Chhanchhuah hna hi ngawrh taka thawh mek zel niin, Chennai a Underwater Robotics team-te chuan chhanchhuah hna thawh mek hi an rawn zawm ve leh a ni.

Planys Technologies hnuaia mite niin, an company tak hi chuan thla khat dawn chhanchhuah hnathawh hi an pui tawh a, tunah hian hnathawh nan hian Remotely Operated Vehicles (ROV) hman a ni dawn a, hemi bakah hian Underwater Robotics team, mi paruk awmna chuan an telpui leh bawk.

Press Trust Of India (PTI) in a tarlan dan chuan heng team-te hian Pathianni aṭang khan chhanchhuah hna hi an thawk ve ṭan a ni.

Khur chhungah hian tui a tam avangin chhanchhuah hnathawh hi a harsa hle a, tui tam tak pump chhuak tawh mah se tui hi an pump kam hleithei lo a ni.