Sorkar damdawi-in lian ber dawttu Sikkim-ah hawng

Sikkim a Sochaygang-ah Thawhṭanni khan ram chhunga sorkar dawm­dawiin lian ber dawttu tur nia sawi, khum 1,022 awmna New Sir Thutob Namgyal Memorial Multi-Speciality Hospital chu Chief minister Pawan Cham­ling chuan a hawng.

Sikkim CM hian dam­dawiin a hawn bakah hian medical college tur lung­phum a phum nghal bawk.

New Sir Thutob Namgyal Memorial Multi-Speciality Hospital hi New Delhi a All India Institute of Medical Sciences(AIIMS) tih lohah chuan ramchhunga sorkar damdawiin lian ber nia chhal a ni.

Damdawiin hawn thar hi ram acre 15-a zauah sak niin kum kaw chhung sak a ni a, cheng vaibelchhe 830 sen a ni. He damdawiin hawn hi a thaw­khatna chiah a la ni a, project hna zawng zawng hi zawh a la ni lo a, project zawh fel vek a nih chuan vaibelchhe 1,281 vel sen a nih rin a ni thung.

Pawan Chamling chuan dawm­dawiin hawn chu kum 24 an sorkar chhunga thil chhin­chhiahtlak berte zinga mi a nih thu a sawi a, Delhi a AIIMS tih lohah chuan ramchhunga sorkar dawmdawiin lian ber a ni. Chamling chuan, "Kan sorkar hian thil chhinchhiahtlak tak kan ti a ni,'' a ti.

Telegraph report in a tarlan dan chuan damdawiin main block hian lirnghing ritcher scale 8 thleng a dawl zo tura ngaih a ni a, chhawng 10 a sang niin sqm 46886 a zau a ni. Lift 13 dah niin general, surgical leh speciality depart­ment-te a awm nghal bawk a, operation theatre 23 dah a ni bawk.

Chamling chuan state khawpui laili taka awm, kum 100 zeta upa Sir Thutob Namgyal Memorial Hospital pawh damdawiin tharah hian thla tawpah sawn a ni dawn tih a sawi.

CM chamling chuan February 1 hi chuan dam­dawiin hi pangai takin kalpui a ni tawh dawn tih sawiin an sorkar chuan regular doctor 47 leh nurse 261 an dah tawh thu leh  super specialists, spe­cialists leh paramedics-te pawh dah turin hma an la mek tih a sawi bawk.

Damdawiinah hian hmanraw changkang tak tak dah niin MRI, CT scanners, Orthopantomogram machine leh Doppler fetal monitor-te pawh dah a ni a, CM chuan treatment engpawh lak theih a nih dawn thu leh state pawn chhuahsan kher a ngai tawh dawn lo tih a sawi.

New Sir Thutob Namgyal Memorial Multi-Speciality Hospi­tal hi Sikkim state khawpui Gang­tok aṭanga km 3 leka awm a ni a, bus pariat service tir tura ruahman a ni bawk. Hetah hian damlo te leh a awmpuitute chu a thlawnin an chuang thei ang.