Manipur zirlai pawlin Teachers' Day boycott

Vawiina Teachers' Day hman tur chu Manipur-a zirlai pawl intelkhawm, Joint Students' Coordination Committee (JSCC) chuan an boycott dawn tih an sawi. 

JSCC-ah hian All Manipur Students' Union (AMSU), Kangleipak Students'  Association (KSA), Manipur Students' Federation (MSF) leh Students' Union of Kangleipak (SUK) an tel a ni. Zirlai pawlte hian Teachers' Day lawmna an boycott chhan chu, he ni hi zirlaiten zirtirtute hnena thilpek inpek ṭhat siakna atana an hman ṭhin vang tih an sawi. Mahse hemi rual hian school leh college-te chu India rama Teachers' Day atana hman, September 5 aiah  International Teachers' Day, October 5 chu hmang zawk turin an ngen zui a ni. 

JSCC convenor Peter Laishram chuan an state-a Teachers' Day lawm dan chuan zirtirtute leh zirlaite inlaichinna chu thil ho lam ang maiin a lantir zawk tih a sawi. Zirtirtute  hnenah thilpek inpekṭhat siakna boruak awm chuan Teachers' Day nihna dik tak a tibo a ni tiin, thil inpek siakna awm vang hian zirlai rethei zawkten engmah an pe ve ngam lo a ni, a ti. Hetianga thiltih hi chhunzawm zel a nih chuan, zirtirtu leh zirlaite inkar boruak a nghawng pawi thei dawn hle a ni, a ti. 

Zirtirtute leh zirlai naupangte inkara inlaichinna awm dan tur dik tak vawnhim zelna turin JSCC chuan Teachers' Day hi a boycott dawn a ni tiin Laihsram chuan a sawi.