Amit Shah-a'n Sept 8-ah Assam tlawh dawn

Union home minister Amit Shah chuan September 8 hian Assam a tlawh dawn a, ni hnih a cham ang.

Home Minister hian North Eastern Council (NEC) plenary session a hmanpui dawn a, hmarchhak chief minister zawng zawng meeting neihpui a tum bawk. National Register of Citizens (NRC) tlangzarh a nih hnua Assam a tlawhna hmasa ber tur a ni a, NRC chungchangah hian Assam BJP-te chu an lungawi lo hle a, hemi chungchangah hian state BJP hruaitute pawh meeting a neihpui rin a ni.

Assam BJP hruaitute chuan NRC chungchangah hian engmah thuchhuah an la nei lo a, mahse NRC list-a tel lo Assam khua leh tui diktak chu humhim an nih theihna turin Amit Shah hnenah hian ngenna erawh an thlen ngei rin a ni bawk.

State BJP president Ranjit Kumar Dass chuan a hmain an party chuan sorkar laipuiah NRC-a tel lo khua leh tuite humhim dilna an thlen tur thu hi a lo sawi tawh a, heihi Amit Shah hnenah hian an thlen ngei dawn niin a lang.