Nagaland : Checkpoint thuam chak turin thupek tichhuak

Nagaland sorkar chuan Thawhlehni khan thupek tichhuakin, an state luhna entry point zawng zawng thuamchak turin an ti.

Assam in National Register of Citizen (NRC) final list a tihchhuah avangin dan loa an state chhunga lut huk an awm lohna turin Nagaland hian thupek hi an tichhuak a ni. Check gate tinah hian police-ten uluk takin dan loa lut an awm lohna turin hma an la ang.

Thupek tichhuaktu hi Principal Secretary (Home), Abhijit Sinha a ni a, tualchhung mi ni lo an state chhunga lut emaw luh tum emawte chu district thuneitute hnena hriattir turin an ti a ni. Thingtlang khua, khawpui leh municipal thuneitu zawng zawngte chu dan loa state chhunga lut an awm lohna tura fimkhur taka hma la turin an ti bawk.

Nagaland-ah hian civil society hrang hrang-  Central Naga Tribes Council leh Naga Students Federation telin sorkarah ngenna an thlen a, Assam-in NRC a kalpui avanga an state-a lut an awm lohna tura hma la turin an lo ngen tawh a ni. Assam hian August 31 khan NRC final list hi an tichhuak a, mi nuai 19 chuang list-ah hian an tel lo.