Nagaland ILP Committee report hmang turin phut

Nagaland-a Joint Committee on Prevention of Illegal Immigration (JCPI) chuan state sorkar hnenah, Inner Line Permit chungchanga Ashishek Committee report chu a taka hmang nghal turin an phut a, Dimapur chu ILP zone-ah puang turin an ngen bawk. 

Tunhnaia Assam-a National Register of Citizens (NRC) final list tihchhuaha mi nuai 19 chuang zet hmaih an ni hian Assam ṭhenawm state-ah nghawng a neih ngei rin a ni. Hei vang hian hmarchhak state dangte chuan list-a tel lo mi tam takte an state lama an luh huk tur veng turin sorkar an nawr hlawm a ni. 

JCPI chuan state sorkar chuan hun khawhral tawh loin, ILP Committee report chu a taka hmang nghal turin an phut tih an sawi. Hei bakah han Disputed Area Belt-ah checkpoint siam vek turin an phut bawk. ILP Committee hian ILP chungchang a zirchianna report hi kumin February thla khan state sorkar hnenah a lo thehlut tawh a ni. Report-ah hian ILP/BEFR chungchangah Standard Operation Procedure (SOP) kalpui a rawt. 

Thuchhuah an siamah, JCPI convenor K. Ghokheto Chophy leh co-convenor Joel Naga-te chuan JCPI hian state pumah ILP chu hman an phut a, mahse state sorkar chu thutlukna siam turin a huaisen tawk lo a ni, an ti. JCPI chuan Governor hlui PB Acharya ngei pawhin Dimapur chu ILP huam tir tur a nih thu a sawi leh, ILP duh loa Supreme Court-a PIL thehluh pawh court-in a hnawlsak tawh hnuah, tun thlenga state sorkarin Dimapur huamchina ILP hman theihna tur siam a la harsat em em chu hriatthiam harsa an tih thu an sawi. 

NSCN(K)-in danloa pem lutte vau Yuang Aung-a kaihhruai NSCN/GPRN (K) chuan thuchhuah siamin, an state-a dan loa pemlutte chu an chetdan an thlithlai reng dawn tih sawiin, ram leilung fa Naga mite an bei a nih chuan ngawi renga an enliam mai loh tur thu a sawi. 

NSCN(K) chuan Naga mi dik takten dan loa an state-a pem lutte kut an tuar fo a, thah hialte an tawk fo tih sawiin, hei hi an thlir liam mai mai tawh dawn lo tih an sawi a ni. Hetiang mi, dan loa pemlutte thlavang lo hauhsak ṭhintute pawh thil ṭha lo a thleng leh a nih chuan mawhphurtuah an puh tel zel tur thu an sawi bawk.