NFR-in station 41-ah national flag dah dawn

Northeast Frontier Railway (NFR) chuan nakkum March thlaah hi chuan hmarchhaka rel station 41-ah national flag dah hman an tum thu an sawi.

Ningania thuchhuah an siamah NFR chuan an passenger-te rilruah nationalism leh patriotism an tuh theihna turin national flag hi dah an tum tih an sawi a ni.

NFR Chief Public Relations Officer Subhanan Chanda chuan state capital, district headquarters leh hmun hmingthang khualzinten an tlawh nasat hmunahte chuan national flag ft. 100-a sang an dah dawn tih a sawi. Tunah hian Assam state khawpui Guwahati leh West Bengal-a New Jalpaiguri railway station-ahte chuan hetiang flag hi an dah tawh tih a sawi bawk.

India ramah hian railway zone 17 a awm a, NRF hian hmarchhak bakah West Bengal-a district panga leh North Bihar-a district pasarih a huam a ni. Tunah hian rel kawng hi an siambelh mek a, hmarchhak state khawpui lian pathum- Imphal (Manipur), Aizawl (Mizoram) leh Kohima (Nagaland)-te chu nakkumah hi chuan rel hmanga kalpawh tir hman an tum.