Tripura University VC a bang

Tripura Central University vice chancellor, VL Dharurkar chu local news channel-in a thil tih dik loh a manchhuah avangin kar kalta Inrinni khan a bang. Dharurkar hian VC hna hi kum khat chuang a chelh hman a ni. 

Vice chancellor  hi university sum a khawih danah thil dik tawk lo tia puh a ni a, hei bakah hian thamna dawng leh, hna pek chungchangah duhsak bik neihah puh a ni bawk. Local news channel, New Vanguard chuan VC hian Kolkata-a printing firm pakhat neitu hnen aṭanga thamna sum a dawng lai chu chang fuhin a tichhuak a ni. New Vanguard managing director, Sebak Bhattacharya chuan printing firm neitu hnen aṭangin VC hian Rs 5,80,000 a dawng a, he firm hnenah hian an hna pek aṭanga 10% a hauh a ni, a ti. He firm chauh ni lo, university in hna a thawh dangah pawh VC hian 10% a hauh zel niin a sawi bawk. Thamna sum a la lai hi VC office-ah leh, firm aiawhtu contractor chenna in, Kolkatta-ah video hian lo lak ruk a ni. 

Hemi hma hian Union ministry of human resource development (MHRD) hnenah vice chancellor laka complaint hi eng emaw zat thehluh a lo ni tawh bawk. MHRD official chuan Inrinni zing khan Dharurkar hi koin, hemi ni vek hian banna thehlut nghal turin a hrilh nia sawi a ni. VC a ban tak avang hian university-a senior most professor, Dr Sangram Sinha chu acting vice chancellor hna chelh tura tih a ni.