NE MP 11-ten NFR official-te meeting neihpui

Hmarchhak state paruka MP 11-te chuan kar kalta Zirtawpni khan Northeast Frontier Railway (NFR) senior official-te meeting an neihpui. 

Meeting hi Maligaon-a NFR headquarter-ah neih a ni. Railways official-te hi NFR General Manager Sanjive Roy-an a ho a, MP te hnenah hian Railway-in hmarchhak biala hmasawnna a kalpui dan hrang hrang te, mipuite duhdan leh mamawhte tipuitling tura an hnathawh dante an hrilh a ni. Roy chuan khualzin phur tlan hun pawh a mumalin hma a sawn zel tih sawiin, NFR hnuaia relte chuan thla hmasa khan a tlan hun 92% in an vawng dik a,  India rama zonal railway zawng zawng zingah hun vawng dik ṭha ber niin an sawi. 

Roy chuan NRF hnuai station zawng zawng chu tun thla tawp hma ngeiin free WiFi facility pek vek an ni dawn tih a sawi. Khualzinte tana remchang zawk turin financial year liamtaah khan station pathumah lift 8 leh escalator 5 siam a ni a, kuminah station dangah lift 35 leh escalator 16 dang dahbelh leh tum a ni, a ti. GM chuan MP-te hnenah hian Guwahati railway line electrification chu kum 2020 March thlaah zawhfel tum a ni tih a sawi  bawk. 

MP-te chuan Railways-in khualzinte tana service ṭha zawk pek tuma an thawhna leh, mipui himna ṭha zawk siamna tur leh hun vawngdik tura an beihnate chu lawmawm an tih thu sawiin, railway minister Piyush Goyal chu hmarchhak bial hmasawnna tura Indian Railways hna thawhna avangin lawmthu an hrilh bawk. MP-te hian hmasawnna leh inkalpawhna ṭha zawk a awm theihna tura rawtna an neihte pawh an sawi a, heng zingah hian rel thar tlan tir te, rel dinna hmun tam zawk siam te, khualzinte tana hmanraw ṭha zawk siamsakte a tel.