China chet dan avangin Arunachal zirlaiten nawrh huaihawt
Arunachal Pradesh ram chhungah China-in khua a din nia sawi a nih avangin All Arunachal Pradesh`Students' Union (AAPSU) chuan Ningani khan lungawi lohna lantirin nawrh an huaihawt.
China hian ramri pelin Arunachal Pradesh-a Upper Subansiri district huam chhungah thingtlang khua a rawn din nia sawi a ni. AAPSU chuan China chet dan an dem thu leh, he thil thleng chungchangah centre-a BJP kaihhruai sorkar laipui a ngawi reng chu an hriatthiam loh thu an sawi.
Itanagar-a Indira Gandhi Park-ah AAPSU leh an hnuai unit hrang hrang bakah tualchhunga pawl ṭhenkhatte chuan nawrh hi huaihawtin, sorkar laipui chu a rang thei anga bera hma la turin an phut thu an tarlang.
AAPSU president Hawa Bagang chuan ram dangte laka an state venhim sak zo loah sorkar laipui chu a puh a, sorkar laipui lamin a remtihsak chuan China sipaite do let turin zirlai pawl chu a inpeih reng a ni, a ti. Bagang chuan an state MP-te pawh China chet dan chungchangte hi auchhuahpui a, Arunachal Pradesh state leh a mipuite tana aw chhuah turin a phut.
Tobom Dai, AAPSU general secretary pawhin thu sawiin, nawrh an huaihawt chu China-in a ram chin nia a chhal ṭhin chu Arunachal Pradesh leilung fate chuan an pawm ngai dawn lo a ni tih sorkar laipui hnenah an hriattirna hmanrua pakhat a ni tih a sawi a, hetih lai hian hemi chungchang sorkar laipuiin a vei tawk lo chuan state mipuite a tilawm lo hle a ni, a ti.