Tripura-in Covid-19 warrior list-ah journalist-te a telh
Tripura sorkar chuan state chhunga journalist-te chu Covid-19 warrior list-ah a telh a, vaccine pek chhuah thawh hnihnaah journalist-te hi pek tel an ni ang.
Cabinet minister Ratan Lal Nath chuan Ningania cabinet meeting chuan Covid-19 warrior list-ah journalist-te telhna tur thutlukna hi a siam tih sawiin, vaccine pek thawh hnihnaa police, armed force leh cleaning staff-te pek rualin pek vek an ni dawn a ni, a ti. Tripura chu hmarchhak state zinga journalist-te duhsakna lantira hetiang zawnga thutlukna siam hmasa ber an ni tih a sawi bawk.
Agartala Press Club chuan a hmain sorkar hnenah journalist-te chu a thlawna vaccine dawng tur zinga telh turin a lo ngen tawh a, Tripura Assembly of Journalists pawhin Union Health Minister hnenah media mite leh an chhungte chu vaccine pek hmasak zingah telh turin an lo ngen tawh bawk a ni. Union minister hian media mite chu January thla chhunga Information Department-a an hming thehlut turin a lo hrilh a ni.
Tripura-ah hian Covid-19 vaccine hi frontline worker 20,233 hnenah pek a ni tawh a, a thawh hnihnaa pek turah hian mi 59,794 ziah luh an ni tawh.