Assam BJP MLA 2-in Citizenship Bill sawisel

Assam-a sorkarna siam mek Bharatiya Janata Party (BJP) MLA pahnih chuan Nilaini khan Citizenship (Amendment) Bill an sawisel. 

Bihpuria bialtu MLA Debananda Hazarika cuan, "Ramdang mi chu ramdang mi an ni. Ramdang mi khua leh tui an nih theihna turin sakhuana chu hmatheh theih a ni lo. Bill hi ka pawm thei lo", tiin a sawi.

Ramdang mi rawn pem lut chu eng sakhua pawh nise khua leh tui nihna pek theih an ni lo tia sawiin, National Register of Citizens update kalpui mek pawh dan loa ramchhunga rawn lut hriatchhuahna tur a nih thu leh bill hi pawm a nih chuan NRC chu awmze nei lo a nih dawn thu a sawi a ni.

Dispur bialtu, BJP MLA tho, Atul Bora Sr. pawhin Citizen­ship (Amendment) Bill chung­changa a dinna chu a chiang hle tih sawiin, an party ngaihdan chu a ngaihdan a nih kher loh thu a sawi bawk. Bora chuan an CM Sarbanada Sonowal chuan Meghalaya sorkar  entawn rawh se, tiin a sawi hial.

Meghalaya sorkar hi hmar­chhak state zinga Bill dodalna resolution siam hmasa ber an ni.

Kartir lam khan BJP MLA pahnih, Lahowal legislator Rituparna Baruah leh Sootea legislator Padma Hazarika-te pawhin Bill hi an duh loh thu an sawi tawh bawk.

Anni bakah hian Assam CM hlui leh Congress hruaitu hlun Tarun Gogoi pawhin Citizenship Bill hi sawiselin CM Sarbanada Sonowal chu CM chak lo tak a nih thu Thawhlehni khan a sawi. 

Gogoi chuan Sonowal chu tui taka a muthilhna aṭanga a harhchhuah a hun tawh tih sawiin, Himanta Biswa Sarma chu heng zawng zawnga mawh­phurtu berah a puh.