Meghalaya NGO-ten PM lim hal

Hmarchhak hmun hrang hrang­ah Citizenship Amendment Bill duh lohna chu lantir chhunzawm zel la niin, Meghalaya-a Garo Hills NGO-te chuan Prime Minister Narendra Modi lim an siam chu an hal.

Garo Hills NGO-te hian West Garo Hills (WGH) deputy commi­ssioner office kawtah Nilaini khan bill duh lohna lantir nan hian sit-in-demonstration an nei a ni. He hunah hian NGO hrang hrang- GSMC, FAF, Mother’s Union, AAYF, FKJGP, ICFS, AAYWS leh AYC-te chuan  AGHJAC-te kaihhruai­na hnuaiah duh lohna hi an lantir.

NGO hruaitute hian deputy commissioner, Ram Singh pawh hmu in CM Conrad Sangma hnena pek tur memorandum an thehlut a, memorandum-ah hian CM chu special Assembly session ko a, sorkar laipui hnena mipuite duhna thlen turin an ngiat.

Sit-in demonstration hi chaw­hma dar 11 aṭanga tlai dar 3 thleng neiin, an theihna zawng zawnga bill chu dan-a a chan lohna tura an dodal dawn thu sawiin, Prime Minister lim siamchawpin an hal bawk a ni.