Citizenship Bill kan dodal zel dawn: Manipur CM Bill duhlohna lantirnaah mi pali hliam

Manipur Chief Minister N. Biren chuan Nilaini khan a kaihhruai BJP leh a thawhpui sorkar-te chuan Manipur leh hmarchhak state danga ram leilung fate venhimna tur dan siam a nih hma chuan Citizenship Bill chu an dodal zel dawn tih a sawi.

Biren Singh hian Inrinni khan a kaihhruai team-te nen Union Home Minister Rajnath Singh hmuin Citizenship Bill dodalna leh hmarchhak venhim chungchangte an sawipui.

CM Biren Singh chuan an sorkarin nikum lama an lo pawm tawh, Manipur Peoples (Protection) Bill, 2018 chu President in a pawmpui theihna turin sorkar laipui nawr an tum thu a sawi a, hmarchhak mipuite chu mi tlemte zawk an nih avangin venhim an ngai tih a sawi. 

Manipur sorkar chu an dinnaah an chiang tih sawiin ram leilung fate venhimna tur siam a nih hma chuan Citizenship Bill chu an dodal zel dawn tih a sawi a ni.

Hetihlai hian Manipur hmun hrang hrangah chuan bill duh­lohna lantirna hi a zual zel a, activist-te chuan Inner Line Permit system an ngiat mek bawk.

Bill duhlotute police-te innawr buainaah hian Thawhlehni khan mi pali in hliam an tuar a, heng zinga pahnih hi hmeichhia an ni.

Imphal leh a chhevela school hrang hrang zirlaite bakah bazar pathuma dawrkai hmeichhiate chuan khawpui chhungah duh lohna hi an lantir a, police-te chuan mipui pungkhawm hnawh­darh nan hian mock bomb leh tear gas-te an hmang hial a ni.