Sorkarin Article 371 a khawih danglam dawn lo : Amit Shah
Union home minister Amit Shah chuan hmarchhak state-te tana special provision pekna, Article 371 chu sorkar laipuiin khawih danglam a tum lo tih Pathianni khan a sawi.
Guwahati-a North East Council 68th plenary session a hmanpuinaah he thu hi sawiin, Amit Shah chuan tunhnaia sorkar laipuiin a titawp, Jammu and Kashmir special status pekna Article 370 chu a nihdan phung takah chuan a remchan dan anga khawih theih a ni a, hei vang hian hmarchhak state tana special status pekna Article 371 nen chuan thil inang lo tak a ni, a ti.
"Jammu and Kashmir-a Article 370 tihbo a nih hnuah, mipui rilru hruai kawi tumin sorkar laipuiin Article 371 pawh a titawp dawn tia thudik tawk lo thehdarh a tam hle a ni," tiin a sawi. Mahse Parliament-ah pawh hemi chungchang hi a sawifiah tih sawiin, Article 371 tihtawp tumna a awm lo a, tunah he thu bawk hi hmarchhak state pasarih chief minister-te hmaah ngei a tiam leh tih a sawi a ni.
Shah chuan, dan loa lutte chu ramchhung khawi hmunah mah an awm phalsak an ni dawn lo tih a sawi a, Assam-a Nation Register of Citizens (NRC) kalpui pawh huntiam chhungin zawhfel hman a ni, a ti. Hmarchhak state-te chu state ramri chungchanga buaina an neih ṭhinte titawp a, hmasawnna tura thawkho turin a sawm. Bangladesh leh India-in ramri buaina an chinfel theih chuan, state-te pawhin ramri buaina an chingfel ve thei tur a ni, tiin Shah chuan a sawi.
NEC meeting-ah hian union minister of state in-charge of DoNER leh NEC vice chairman Dr Jitendra Singh-te pawhin thu an sawi ve bawk. Dr. Jitendra Singh chuan hmarchhak bial danglam biknate sawiin, hmarchhak miten ramchhung hmundang amite hnen aṭanga thil zir tur tam tak an neih rualin, hemi aia tam mah hi India ram hmundang amiten hmarchhak aṭangin zir tur an nei zawk a ni, tiin a sawi.
DoNER minister chuan prime minister Narendra Modi duhdan angin, kar hnih danah union minister pakhat talin hmarchhak bial chu tlawhin, mipuite mamawh leh harsatnate an ngaihthlak sak ang a, hma an sawn theihna turin theihtawp an chhuah zel dawn a ni, a ti. Sorkar laipuiin hmarchhak bial hmasawnna chu a ngai pawimawh takzet tih sawiin, kum 2019-20 atana North East Council budget pawh a la san ber ṭum niin, cheng vaibelchhe 1,476 dah a nih thu a sawi bawk.