Meghalaya Assembly Speaker September 13-ah thlang dawn

Meghalaya Assembly Speaker thlanna chu September 13 hian an nei dawn tih Deputy Speaker Timothy D. Shira chuan nimin khan a sawi.

Assembly speaker ni lai, United Democratic Party (UDP) president Donkupar Roy chu July 28 khan a thi a, hemi a nih avang hian speaker post hi a ruak a ni. 

Sorkar lai Meghalaya Democratic Alliance (MDA) chuan Tourism Minister, Metbah Lyngdoh chu speaker ni tur hian an thehchhuak. Lyngdoh hi UDP legislator niin Meghalaya Assembly-ah hian ṭerm thum member a ni tawh. Deputy Chief Minister Prestone Tynsong hoa committee an neihnaah MDA chuan Lyndoh thehchhuak tur hian thutlukna an siam.

Hetihlai hian eptu Congress chuan MLA atana ṭum hnih thlan tlin tawh Winnerson D. Sangma chu an thehchhuak ve bawk. Nikum March thlaa speaker tur thlannaah khan Winnerson hi a ding tawh bawk a, Donkupar Roy kha a hneh zo ta lo a ni.

Meghalaya Assembly-ah hian seat 60 awmin tunah hian member 59 an awm mek. Ṭangrual sorkar khaidingtu ber National People’s Party chuan member 21 an nei a, UDP chuan pariat neiin People’s Democratic Front chuan pali an nei bawk.   Bharatiya Janata Party leh Hill State People’s Party-te chuan member pahnih ve ve an nei ve bawk a ni. Nationalist Congress Party leh Khun Hynniewtrep National Awakening Movement-te chuan member pakhat ve ve neiin, Indepenedent member pakhat a awm bawk. Congress-in member 19 an nei thung.