Inbiaknaa NDFB (S) tel tir turin duh

Assam helpawl hruaitu hlui, politician ni ta Hagrama Mohilary chuan inremna kawng zawnga inbiaknaah Na­tional Democratic Front of Bodoland, NDFB (S)-te tel tir ve turin union home minister Amit Shah hnenah a dil. 

Mohilary chuan, "Assam-ah hian inlakhran duhtu pawl vangin harsatna a la thleng fo a, hei hi mi zawng zawngin an hre vek a ni. Bo­doland-a NDFB (S)-te vang hian harsatna a la awm a, anni pawl hi ramhnuaiah an la biru mek a ni. Phalna min pek chuan, inbiakna dawhkan kil ve turin ka sawm thei ang", tiin a sawi. 

Bodoland Territorial Council chief executive member, Mohilary chuan inbiakna neihpui dan kawng pawh a lo hawng tawh tih sawiin, union home minister-in phalna a pek chuan sorkar aiawhte nena inbe turin a hruai theih tur thu a sawi a ni. 

Mohilary hi helpawl ṭhiah tak, Bodo Libera­tion Tigers (BLT) hotu a ni ṭhin a, Bodo hnam tana Bodoland hran siam phutin an hel ṭhin a ni. Mahse kum 2003 khan sorkar nen inremna siamin, Bodo Accord an ziak a ni. Hemi hnu hian a kaihhruai political party, Bodoland People's Front (BPF) chu kum 2005-a council inthlanah chakin, tun thlengin thuneihna an la chelh chhunzawm a ni. BPF hi Assam-a BJP kaihhruai sorkar nen an thawkdun bawk.