Sorkar laipuiin Assam leh AP ṭanpuina sum pe dawn

Union home minister Amit Shah kaihhruai high-level committee chuan kum 2020-a tuilian leh leiminin chhiatna nasat tak a thlenna state panga-te ṭanpuina sum, cheng vaibelchhe 1,751 pek chhuah a remti. 

Ministry of Home Affairs (MHA) in ṭanpuina pek tur state a tarlan zingah hian hmarchhak state pahnih Assam leh Arunachal Pradesh an tel a, anni bakah Odisha, Telangana leh Uttar Pradesh-te pek an dawn a ni. 

Assam tan ṭanpuina hi Rs vbc 437.15 pek a ni dawn a, Arunachal Pradesh tan Rs vbc 78.86, Odisha tan Rs vbc 320.94, Telangana tan Rs vbc 245.96 leh Uttar Pradesh tan Rs vbc 386.06 pek a ni ang. 

Heng state panga-ah hian tuilian leh leiminin chhiatna a thlen dantte enfiah turin sorkar laipui chuan inter-ministerial central team a lo tirh tawh a ni. Amit Shah chuan prime minister Narendra Modi kaihhruaina hnuaia sorkar laipui chuan harsatna leh chhiatna tawk state leh mipuite chu theihtawpa ṭanpui zel a tum a ni, a ti. 

Kum 2020-21 chhun­gin sorkar laipui chuan state 28 ṭanpuina turin State Disaster Response Fund aṭangin Rs vbc 19,036.43  leh National Disaster Response Fund (NDRF) aṭangin state 11 tan Rs vbc 4,409.71 a lo pe tawh a ni.