Assam NRC tihchhuah hnuah ramdang mi 223 manchhuak tawh: Meghalaya CM

Meghalaya chief minis­ter Conrad K Sangma chuan Meghalaya state assembly-ah Assam-in NRC list a tihchhuah hnu­ah ramdang mi 223 man chhuah an ni tawh tih a sawi.

Autumn Session neih mekah Leader of Oppo­sition, Dr Mukul Sangma leh Congress MLA Ampa­reen Lyngdoh-te zawhna chhangin, Sangma chuan Assam NRC list tih­chhuah hnuah ramdang mi 223 manchhuah an ni tawh tih hi a sawi. Heng zinga a tam ber, 114 hi chu Byrnihat-a man an ni a, Dainadubi-ah 66, Ratacherra-ah panga leh Khliehriat-ah pathum an man tawh thu a sawi a ni. Heng an mi manchhuahte hian document mumal tak hmuh tur an nei lo tih leh an lo kalna hmun lamah thawn let leh an nih thu a sawi bawk.

Sangma chuan Assam CM hnenah pawh hemi chungchang hi a thlen tawh tih a sawi a ni. Meghalaya-a NRC kal­pui phut ve a nih chung changah Sangma chuan sorkar laipui chuan citizen­ship chungchangah dan a siam thei a, state sorkar erawhin a thei lo a ni, a ti. NRC leh citizenship chung changah state chuan dan siam theihna turin thuneihna a nei lo a, state sorkar chuan NRC kalpui turin thu a nei lo a ni, tiin a chhang. 

NRC chu Meghalaya Democratic Alliance (MDA) sorkarin a ngaihpawimawh thu leh hemi chungchang hi sorkar laipui hnenah pawh a thlen tawh a, Assam CM hnenah pawh a thlen tawh tih a sawi. Mahni ram mipuite humhimna dan tur chu an siamchhuah a ngai dawn tih a sawi bawk.