Tripura eptuten nawrh huaihawtah vau

Tripura sorkarin heathcare services tariff tihsan a tum avangin eptu party-te an lungawi lo a, sorkar chu a thu sut leh tura phutin, a sut loh chuan state pum huapa nawrh huaihawtah an vau. 

BJP-IPFT sorkar chuan kar kal ta Zirtawpni khan thuchhuah siamin, Antodaya Annapurna Yojana (AAY) beneficiary-te tana ICU khum luah man chu ni khatah Rs 300 leh, above poverty line (APL) tan ni khatah Rs 600 a ni tawh dawn tih an sawi a ni. A hmain AAY leh APL beneficiary-te hi sum chawi tir an ni ngai lo. 

Sorkar damdawi-ina AC cabin-a awm man chu ni khatah Rs 700 niin, APL damlote chuan chaw ei  manah nitin Rs 50 an chawi tel a ngai dawn a ni. Chaw ei man hi a hmain chawitir an ni ngai lo a, AC cabin luah man pawh Rs 400 a ni ṭhin. 

Sorkarin healthcare service hman man a tihsan tharah hian, APL leh AAY damlote chuan diagnostic test hrang hrangah pawh an chawi a ngai tawh dawn a ni. Eptute chuan hei hi duh lohin, sor­kar thiltih dan chu mipuite an beihna angah an ngaih thu Tripura Pradesh Congress Committee (TPCC) vice president Tapas Day chuan a sawi. Sorkarin a thu a sut leh hma chuan district zawng zawngah lungawi lohna lantir an tum tih a sawi bawk. CPI(M) pawhin sorkar thiltih dan chu an pawm thei lo tih sawiin, state pumah nawrh an huaihawt dawn tih an sawi. 

Health minister hlui leh BJP MLA Sudip Roy Burman chuan rate thar vang hian mipui nawlpuiin sorkar hospital-te pan thei loin, enkawlna ṭha an dawn theih loh phah dawn tih a sawi. Sorkar chu a rate siam thar chungchang hi ennawn leh turin a ngen.