Tripura CM-in Khowai district court building hawng

Tripura chief minister Biplab Kumar Deb chuan nimin zingah khan Khowai district court building sak thar a hawng.

Khowai district court buil­ding hi November 2016 khan sak ṭan a ni a, cheng vaibelchhe 25 sen niin, nimin khan hawn a ni ta a ni. Sorkar hmasa Left Front khan Khowai district chhunga court awm zawng zawng chu hmun khata chhunkhawm an tum avangin building thar hi an sa a ni.

Khowai district-a session court, CJM court, SDJM court leh family court-te chu he building tharah hian dah a ni ve tawh dawn bawk. Biplab Kumar Deb chuan CM hmasa Manik Sarkar chung­chang, a hming sawi lang loa sawiin prime minister Narendra Modi hnen aṭangin 'good gover­nance' a zir tih leh midang hlawh­chhamte hnen aṭanga thu­rawn la duh lo mi a nih thu a sawi.

Sorkar hmasa chu bei zuiin kum 25 liam ta chhung khan Left Front sorkar hnuaiah khan work culture a awm lo nia puhin, sorkar hnathawkte khan hlawh la mah se an tih tur an ti lo a ni, a ti. Thla 18 kal ta chhungah erawh kha chuan thil a inthlak danglam nasa hle tih leh engkim erawh a la inthlak danglam hman lo a ni, a ti.