JCILPS-in nawrh huaihawt tharthawh lehah vau

Manipur-a Inner Line Permit (ILP) system hman phuttu, Joint Committee on Inner Line Permit System (JCILPS) chuan an thil phut tihhlawhtlin a nih theihna tura nawrh an huaihawt ṭhin chu tharthawh lehah an vau. 

JCILPS convenor thar, YK Dhiren chuan sorkar laipui chuan Manipur mipuite duhdan chu ngaih pawimawh sak loin, a infiampui mai mai niin a sawi. Sorkar laipui chu Manipur People Bill 2018 a pawm loh avangin na takin a sawisel nghal bawk. 

Manipur People Bill 2018 hi Manipur Legislative Assembly chuan kum 2018, July thla khan a lo pass tawh a ni. He bill hi hmun dang aṭanga an state-a pem luh tumte endik theihna tur a ni. Mahse Assembly-in a pass aṭanga kum khat liam hnuah pawh, India President chuan bill hi a la pawmpui loh avangin hman theih a la ni lo. 

Dhiren chuan sorkar laipui chuan state mipuite rilru leh an duhdante hrereng chungin bill hi a ngaihpawimawh sak lo tih a sawi. "Sorkar laipui hian state mipuite hi ngai pawimawh tak tak ni se, bill hi a hma thei ang berin a pawmsak ngei ang," a ti.