AASU-in CAB chungchangah Assam Chief Minister sawisel

All Assam Students' Union (AASU) chuan an pawl president hlui leh tuna Assam chief minister ni mek, Sarbananda Sonowal chu North East Democratic Alliance (NEDA) conclave neih zawh takah, Citizenship Amendment Bill (CAB) chungchangah engmah a sawichhuah loh avangin na takin an sawisel. 

Guwahati-a NEDA con­clave-ah hian union home minister Amit Shah chuan sorkar laipuiin CAB kalpui a tum chungchang a sawichhuak leh a ni. AASU general secretary Lurin Jyoti Gogoi chuan sorkar laipuiin CAB kalpui a tum a duh loh leh dodal thu a sawichhuah loh avangin Assam CM chuan Assam mipuite a phatsan a ni, a ti. 

Hmarchhak state dang chief minister, a bikin Meghalaya chief minister Conrad Sangma chu fakin, Gogoi chuan Sang­ma-a'n home minister hma ngeiah CAB na taka dodal a, hmarchhak bial mipuite duhdan a ni lo tih a sawi chhuak chu a fak. Assam CM leh NEA hnuaia tel, Asom Gana Parishad-te chu hmarchhak state dang chief minister-te hnena aṭanga inzir turin a chah bawk. 

Tunhnaia Assam-in National Register of Citizens (NRC) final list a tihchhuahah, dan loa an state-a awm mi tam tak telh nia sawi chungchangah, AASU chuan Supreme Court-ah zualko an tum tih an sawi bawk a ni. Northeast Forum for Indi­genous People (NEFIP) pawhin home minister-in hmarchhak mite identity, culture leh custom-te venhim an ni ang tia a tiam chu lawmawm an tih thu an sawi rualin, CAB erawh an dodal tlat tih an sawi. CAB chu hmarchhak bial mipuite chimralna tur a ni, an ti.