Manipur-ah hel inkap, pahnih thi

Manipur Pherzawl district-ah Kuki hel pawl pahnih inkarah buaina chhuakin an inkap a, mi pahnih an thih bakah pahnih an hliam tih Nilaini khan Manipur police-te chuan an sawi. 

Police official-te chuan hel pawl pahnih hi Nilaini zingkar hma tak, dar 1:20 velah an inkap tih an sawi a, hel pawl inkapte hi Liberation Tigers of Tribal (LTT) leh United Tribal Liberation Army (UTLA)-te nia an hriat thu leh Saikulphai Suangphumun hmuna inkap an nih thu an sawi bawk.

Saikulphai Suangphumun hi Parbung police station huamchhunga awm niin, Mizoram ramri bula awm an ni. Hel pahnih thite hi UTLA mi ve ve nia an hriat thu police-te chuan an sawi a ni. Thite hi tute nge an nih pawh an hre tawh a, hliam pakhat zawk pawh hi tunge a ni tih an hriat tawh thu leh pakhat erawh an la hriat chhuah loh thu an sawi.

Hliamte hi an dinhmun a ṭha lo hle a, Noney district headquarters-a damdawi-inah an enkawl a ni.