Arunachal-in power project 22 an titawp

Arunachal Pradesh chief minister Pema Khandu chuan Zirtawpni liam ta khan state sorkar chuan an state chhunga power project 22 an titawp  tawh tih a sawi. 

Heng project an tihtawpte hi thawh a nih loh vanga tihtawp a ni a, 3,800 MW thleng an pechhuak thei a ni. Project dang 46, 8,000 MW vel thleng pechhuak theite pawh hna thawk ṭha tura hriattirna an pe bawk.

Arunachal hian Zirtawpni khan 24MW Dikshi Hydroelectric Project an hawng a, heta a thusawinaah hian Chief Minister chuan hemi chungchang hi a sawi a ni.

24MW Dikshi Hydroelectric Project hi West Kameng district-a awm niin, CM chuan he project thawktu Devi Energies Pvt Ltd-te chu a hun taka an zawh theih avangin a lawmpui thu a sawi. Dikshi Hydroelectric Project hi November 2016 khan Pema Khandu hian a lungphum a phum a ni. 

Khandu chuan Arunachal chu 'power house of the nation' tia hriat a nih ṭhin thu leh helam kawnga an theihna zawng zawng hmanchhuah a nih phei chuan an state economy chu  nasa takin a danglam thei dawn tih a sawi. Project tam tak, MoU an ziah­pui vek tawh, hmasawnna awm lo tam tak a awm tih leh project thawh tura ruahman 68 zet laka action an lak tawh thu a sawi bawk.