Assam aṭangin sipai 10,000 ko kir

Sorkar laipuiin Assam-a National Re­giser of Citizens (NRC) final list a tihchhuah dawn vanga buaina a thlen palh venthawn thila sipai 10,000 duty tir te chu ko kirin, an base lamah an kir tawh niin official-te chuan an sawi. 

August 31-a NRC final list tihchhuahah mi nuai 19 chuang zet telh an ni lo a, hei vang hian buaina a chhuah pawh an  hlauthawng hman hle. Mahse pawl hrang hrangin final list hi sawisel mah se, buaina leh tharum thawhna lian tham chhuak a awm lo. Hei vang hian NRC vanga buaina a chhuah palh a, dan leh thupek kengkawh tura sipai dah luh pawh an awm chhunzawm zel a ngai lo niin sorkar laipui chuan a ngai a ni. 

Ministry of Home Affairs chuan kar kal ta Zirtawpni khan Assam state chhung dinhmun hi thlirin, sipai company 100 dahte chu ko kir turin thutlukna hi a siam ta a ni. Assam-a paramilitary force company 100 dah zinga company 50 hi BSF niin, CRPF company 10, ITBP 16 leh  SSB company 24 an ni. Company pakhatah hian sipai 100 bawr zel an awm. Sipaite hi Assam-a tirh an nih hmaa an awmna base-a kir leh tura hriattir an nih thu official chuan a sawi.