Assam Congress-in NRC list-a tel lote hmuh tum

Assam Congress chuan National Register of Citizen (NRC) final list-a tel lote hmuhna tura campaign chu Inrinni khan an hawng.

Tinsukia district-ah cam­paign hi ṭanin Assam Congress chief Ripun Bora pawhin he hun hi a hmanpui. Bora chuan Assam state hmun hrang hrangah zinkualin NRC list-a tel lote an hmu dawn tih a sawi a, September 28 thleng he campaign hi an kalpui dawn tih a sawi bawk.

Bora chuan India khua leh tui dik takte chu NRC-ah hian telh kan phut a ni, tia sawiin, Congress chuan North Eastern Coordination Committee (NECC) tichak turin Zirtawpni khan thutlukna an siam tawh bawk. NECC hian thla thum danah meeting an nei ziah tawh dawn a, BJP chu NRC kalpui mek politics nena kaikawpah an puh a ni.

Assam NRC final list hi August 31 khan tlangzarh a ni a, hming thehlut mi vaibelchhe 3 chuang zinga nuai 19 chuang zet chu list-ah hian an tel lo a ni. NRC list hi online-a en theih turin an chhawpchhuak tawh bawk.