Assam police leh Meghalaya mite inkarah buaina chhuak
Pradhan Mantri Gram Sadak Yojana (PMGSY) hnuaia kawngpui siam chungchangah Inrinni khan Meghalaya West Khasi Hills-a Riangdo block hnuaia thingtlang khaw 15-a chengte leh Assam police-te inkarah buaina a chhuak.
PMGSY hnuaiah hian Ranighat thingtlang khuaa kawngpui siam hna thawh mek chu Assam police-te hian tihtawp an tum a, hei hi duh loin a chhehvel khaw 15-a chengte pungkhawm leh police-te hi an innawrbuai a ni.
Police-te hian truck driver leh JCB pawh an man nia sawi a ni. Tualchhung mite chuan Assam Kamrup district hnuaia Hahim Outpost police-te chuan kawng siamna bungrua an man bakah hnathawktute pawh vauin an kawngsiam titawp turin an ti tih an sawi.
Kawngpui siam hna hi nikum lam aṭanga ṭan tawh kha niin ruahtui a tam avangin a hun takah zawh theih a ni lo a, hna an ṭan leh chiah a, Assam police-te hian an tawp tir leh si niin an sawi bawk. Buaina chhuahna hmun hi Assam leh Meghalaya inrina a ni a, hemi hmunah vawi eng emaw zat ramri chungchang vang hian buaina a chhuak tawh. Rambrai-Jyrngam constituency hnuaia awm a nih angin bialtu MLA Kimfa S Marbaniang chuan chief minister Conrad K Sangma pawh hemi chungchangah hian a hmu ngal dawn tih a sawi.
Ramri chungchang sawi tur hian Conrad Sangma hian Assam chief minister Sarbananda Sonowal meeting neihpui a tum sa tawh hrim hrim bawk a ni. Assam leh Meghalaya hian ramri inchuh hmun 12-ah an nei a, Inrinni-a buaina chhuahna pawh hi chung zinga mi chu a ni. MLA Kimfa S Marbaniang chuan tunṭuma an buaina tawh hi thil thar a ni lo tih leh thla liam ta pawh khan buaina a chhuah tawh thu a sawi.