Manipur-in UN International Conference thleng dawn
Manipur chuan September 30 - October 1 hian ruihhlo hmansual, HIV/AIDS-in hmarchhak biala harsatna a thlen dante sawihona tur, United National International Conference a thleng dawn tih Governor Dr Najma Heptulla chuan a sawi.
Manipur State Commission for Women Foundation Day lawmnaa thu a sawiah, Governor chuan UN International Conference-ah hian ram pasarih aiawh an tel dawn tih a sawi a, Manipur chief minister hnenah pawh he conference-a tel tur hian hmarchhak state hrang hranga chief minister-te sawm turin a ngen.
Mipat hmeichhiat lam hawia hmeichhiate khawih leh pawngsual case-te chu Manipur-ah a pung nasa hle tih Governor chuan a sawi bawk a, hei vang hian hmeichhiate chunga dik lo taka chetna thleng ṭhin do let tur leh siamṭhat tumin pawl hrang hrangin an bei mek a ni, a ti. HIV/AIDS vei nu, hmeichhia, hmeithai leh fahrahte chu enhran an ni fo tih sawiin, an dikna chanvote pawh palzut sak a ni fo a ni, tiin a sawi.
Dr Heptulla chuan hmeichhiate thliarhranna leh an laka tharum thawhna thleng ṭhin laka venhimna tur dante chu siam ni mah se, heng dante hi tun thlengin a taka kalpui theih loin tihkhawtlai leh tihbahlah a la ni fo tih a sawi bawk.
Chief minister N Biren Singh pawhin thu sawiin, a kaihhruai state sorkar chuan hmeichhiate dinhmun chawikan a, thuam chak chu a dah pawimawh a, hmeichhiate hamṭhatna pekna tur welfare scheme hrang hrang pawh siam a nih thu a sawi. An state-ah hmeichhiate chu kawng hrang hrangah hmahruaitute an ni chho zel tih a sawi bawk a ni.
CM chuan, "PM Narendra Mod-a'n Beti bachao Beti Padhao campaign a kalpuina hnuaiah state sorkar chuan zirna in hrang hrangah hmeichhe zirlaite a dah pawimawh hle a ni. Hei bakah hian hmeichhia pual bik bazar-te siam niin, hmeichhiate laka pawikhawina thleng ṭhin ngaihtuahtu tur hi Fast Track Court pawh din a nih tawh bawk. District hrang hrangah women police station pawh siam a ni," a ti. Ruihhlo leh zu chuan khawtlang nunah nghawng ṭha lo tak a nei tih sawiin, CM chuan state chhunga nu leh hmeichhiate chu an state-a harsatna thlen ṭhin thilte bei let tura lungrual taka thawkho turin a sawm bawk a ni.