Hindi hman tir tumna Sahitya Sabha leh AASU-in dodal

Union home minister Amit Shah-a'n September 14, Hindi Diwas-a India ram tan ṭawng pakhat, Hindi chauh neih a pawimawh nia a sawi chu Assam Sahitya Sabha leh All Assam Students' Union (AASU) chuan an duh loh thu an sawi. 

Home minister hian hmarchhak bial naupangte pawh Hindi chu zirtir ngei ngei tur an ni tiin a sawi tel tih report ṭhenkhat chuan an tarlang bawk. Amit Shah thusawi hi chhangin, Assam Sahitya Sabha president Dr Paramananda Rajbongshi chuan ram hruitute tan chuan India ram chu state hrang hrang infinkhawm a ni tih an hriat a pawimawh tih a sawi. Naupangte tan pawh anzirna kawngah an 'mother tongue' chu a pawimawh hmasa tih pawh hriat tel a ṭul a ni, a ti. Anmahni ṭawng ngei an thiam chian hnuah Hindi emaw, English emaw zirtir an ni chauh tur a ni tiin, Dr Rajbongshi chuan hei hi zawm a nih loh a, Hindi zirtir luih hmasak an nih chuan an pawl chuan ngawi rengin an thlir mai mai dawn lo tih a sawi. 

AASU pawhin hmarchhak biala Hindi zirtir luih tumna a awm chuan an dodal dawn tih an sawi bawk. AASU chief advisor Samujjal Bhattacharya chuan union minister rawtna siam chu democracy kalphung lo leh, anti-national a nih thu a sawi. Assam-ah chuan school level-ah Hindi leh Sankskrit bakah ṭawng dangte pawh zirtir an ni tiin, Assam leh hmarchhak state danga Hindi zirtir luih tir an nih chuan Indian Constitution kalh a ni dawn a ni, a ti. Sorkar laipui chuan hmarchhak mite culture chu an dah pawimawh sakin an zahsak tur a ni, an ti.