Manipur CM-in media-te thawhpuiah a sawm
Manipur chief minister N Biren Singh chuan an kaihhruai sorkarin ruihhlo do beihpui a thlak meknaah media mite chu thawhpuiah a sawm.
Thawhṭannia All Manipur Working Journalists' Union (AMWJU) 46th Foundation Day lawmna, Imphal-a Manipur Press Club-a neih chu hmanpuiin, CM chuan media chu democracy tana in pawimawh tak pakhat a nih thu a sawi.
CM Singh chuan an state-a ṭhalaite chu ruihhlo leh zuin a tibuai nasa hle tih sawiin, sorkarin ruihhlo laka fihlim state siam tuma hma a lak mekna chu a hlawhtlin theihna turin media mite chu sorkar thawhpui turin a ngen.
Manipur-a zu khapna hlih chungchangah CM chuan AMWJU, media house leh pawl dangte chu seminar, awareness campaign-te buatsaih a, zu khapna dan hlihin state tana ṭhatna leh chhiatna a thlen theih dante sawiho turin a ngen bawk.
State hmasawnna tur atana media lamin rawtna leh sorkar thiltih dan sawselna an neih ṭhinte pawh sorkar lam chuan lawm takin a lo dawngsawng zel dawn tih CM chuan a sawi. Journalist-te hamṭhatna pekna turin sorkar chuan a theih angin a pui zel dawn tih leh, Manipur State Journalists Pension Scheme hnuaia pension pek zat pawh sorkarin tihpun a tum thu a sawi.
AMWJU president Kakchingtabam Bijoy pawhin thu sawiin, journalist-te chu inlungrualna ṭha tak nena hna a thawh a ṭul thu a sawi a, hemi rual hian an hnathawhna kawnga harsatna an neih hrang hrangte a sawilang nghal bawk.