Forward Bloc-in Tripura-a NRC leh ILP kalpui duh lo

Forward Bloc chuan Tripura state-a National Register of Citizen (NRC) kalpui an duh loh thu leh, Inner Line Permit (ILP) sytem pawh hman an duh lo tih an sawi. 

Party state secretary Shyamal Roy chuan hemi chungchang hi union home minister Amit Shah hnenah pawh ziakin an hriattir tih a sawi. Roy chuan, “Tripura hi Assam leh hmarchhak state dang nena khaikhin theih a ni lo. Tripura lalte chuan Bengal khawchhak lam ram zau tak an lo hneh tawh a, Bengali chungchang pawh he lalram tan hian buaipui tel a ngai a ni,” a ti. Tripura lalte khan tribal ramte humhalhna turin Tribal Reserve System an lo siam a, mahse tribal leh non-tribal te thliarhranna tur ILP system kha an hmang ve lo a ni, a ti. 

“Sorkar laipuiin Tribal Areas Autonomous District Council-a ILP a hmang a nih chuan, state chhunga mipuite chetvelna leh bungrua kal vel dan thlengin a nghawng buai dawn a ni. Bengali-te tan Agartala aṭanga km 20 vel an thlenin ILP  hi an lak zel a ngai dawn a ni,” tin Roy chuan a sawi. 

Tripura chu India ram state zingah kum 1960 chho aṭanga mumal taka citizenship certificate pechhuak awmchhun a ni tiin, heng certificate hi hna zawn nan, lehkha zir nan, sumdawnna atan leh ram leina atan neih tel ngei a ngai ṭhin tih Roy chuan a sawi bawk. “Citizen list mumal takin kan nei a, hei vang hian NRC hi kan mamawh ve lo,” a ti.