Zirtirtute nawrh huaihawtna inrawlhna kan nei lo : CPI-M

Tripura eptu party, Communist Party of India-Marxist (CPI-M) chuan an state-a zirtirtu aṭanga ban ten nawrh an huaihawt mekah an party chuan inhnamhnawihna an nei lo tih an sawi. 

Education minister Ram Nath chuan kar liam ta Inrinni khan zirtirtu ban takten an hnaa dah let phuta nawrh an huaihawt mekah eptu party-te chu a ruka inrawlhin, an lo fuih ṭhin niin a puh. January 27-a nawrh huaihawtten kawng an zawh ṭum pawh khan CPI-M mi leh sa 350 vel an tel niin a sawi bawk. 

Minister thusawi hi Pathianni khan chhangin, CPI-M state secretary Goutam Das chuan, "Kawng zawhnaah kan party mite an tel lo. Buaina chhuaka hliam tuarte pawh kha zirtirtu vek an nih kha. Media report ṭhenkhat chuan zirtirtu nawrh huaihawtte leh police-te innawr buainaah khan police ho zingah hian BJP leh RSS worker-te an tel niin an tarlang zawk a ni," a ti. Zirtirtu ban takte hian democracy kalphung zawm a, boruak ṭha tak hnuaia nawrh an huaihawt chu CPI-M leh Left party-te chuan an thlawp zel dawn tih a sawi. 

"Police leh nawrh huaihawtte innawr buainaa zirtirtu hliam ṭhenkhat chu damdawi-ina dah luh an ngai a, mahse  heti chung hian ni li chhung chu Education Minister hi a ngawi reng a, tunah hian thu belhchian dawl lo hmangin zirtirtu leh eptu party-te min rawn bei ta zawk a ni," tiin Das chuan a sawi bawk. 

Nawrh huaihawtte hian January 27 khan Chief Minister hmuh tumin kawng an zawh a, police-ten lo dangin an innawr buai a, mi 87 in hliam an tuar a ni. Hliam tuar zinga 70 chu zirtirtute niin police lamah mi 17-in hliam an tuar ve bawk. Police  hliam tuar zingah hian hmeichhia paruk an tel. West district police-te chuan buaina chhuak vang hian nawrh huaihawtte lakah hian thubuai pahnih an ziak lut. District magistrate chuan zirtirtu-te hian police motor pali an tichhia niin a sawi.