Oil company official rukbote an thi a nih chuan Assam leh AP CM-te thiam loh a ni ang : ULFA-I

United Liberation Front of Asom-Independent (ULFA-I) chuan thla khat liam taa private sector oil company official pahnih an hren mekte chu an thi a nih chuan, a mawhphurtu chu Assam leh Arunachal Pradesh chief minister-te an ni ang, a ti. 

ULFA-I hian thuchhuah siamin, an mi rukbote tlan chhuah an nih theihna turin sorkar pahnihte hian hma an la lo a, chhuah tir tum aiin security force, central sorkar-a intelligence agency leh midangte nen beihpui an thlak zawk a ni, a ti. Official rukbo pahnihte chunga thil ṭha lo a thlen chuan ULFA-I te chu mawhphurh tir an tum a, mahse heng mi pahnihte hi an thi a nih chuan state pahnih CM-te chu thiam loh a ni zawk ang, tiin an sawi. 

Arunachal Pradesh leh Assam police-te chuan Delhi-based Quippo Oil and Gas Infrastructure Ltd. official pahnih rukbo chin hi an la hre thei lo tih an sawi. Hetih lai hian ULFA-I hian kar liam ta khan thuchhuah siamin, nikum December 21-a AP-a Changlang district aṭanga an rukbo, drilling superintendent Pranab Kumar Gogoi leh radio operator Ram Kumar-te awmdan tur chu February 17-ah thutlukna an siam dawn tih a sawi bawk. 

ULFA-I chuan Quippo Oil and Gas Infrastructure Ltd hian an thil  phutte a tihhlawhtlin loh chuan an company hi Assam leh South East Asia-a hnathawh an phalsak dawn lo tih an sawi a, an thil phut tak erawh chu an sawilang leh tawh lo. Mahse Aruanchal Pradesh police hotu, RP Upadhyaya chuan ULFA-I hian an mi rukbote tlanchhuahna atan hian cheng vaibelchhe 20 thu a lo sawi tawh a ni.