Naga accord : Sorkar laipui-in AP leh Manipur-ah autonomous council 2 din dawn

Naga peace accord peng pakhat atan sorkar laipui chuan Arunachal Pradesh leh Manipur-a Naga hnam chenna bialah autonomous council pahnih a din dawn. 

Heng autonomous council pahnihte hi Constitution-a Sixth Schedule provision hnuiah din an ni dawn a ni. Hei bakah hian Nagaland chuan Lok Sabha-ah seat pakhat a neih belh dawn a, sorkar chuan inremna an siam hnuaia hel inpete awmna leh chhawmdawlna tur pawh a buatsaih dawn bawk a ni. 

Report-in a tarlan danin, NSCN(IM) leh Naga helpawl dangten leh sorkar laipuiin inremna zawnga inbiakna an neih pawh an zo fel tawh bawk. 

Sorkar laipui leh Naga helpawlte hian inremna siam tumin kum 1997 aṭangin khan inbiakna hi an lo nei ṭan tawh a ni. Sorkar chuan inbiakna tihfel nan hian nikum October 31 kha a ruat a, mahse an hun ruatah hian an tifel hman lo a ni. 

Remna zawnga inbiaknaa sorkar laipui aiawh, tuna Nagaland Governor ni ta, RN Ravi chuan remna siam turah hian a  huam zau thei ang ber leh mipuite duhdan anga siam tum a ni tih sawiin, Naga civil society group hrang hrangte pawh inbiakna a neihpui a ni. Hei bakah hian Nagaland ṭhenawm, Manipur leh Aru­nachal Pradesh sorkarte pawh biakrawn tel an ni bawk.