Assam NGO-in NRC fund hman dan CBI chhuitir phut

Assam NGO, Assam Public Works (APW) chuan an state-a National Register of Citizens (NRC) fund hman a nih dan chu Central Bureau of Investigation (CBI) chhui chiantir an phut. 

NRC update-na tur hian sorkar laipui leh state sorkar chuan fund an pe a ni. APW president Abhijeet Sharma chuan NRC kalpuina atan hian cheng vaibelchhe  1,600 zet hman ral a ni a, official-ten sum an hman danah hian thil dik tawk lo awm ni ngeia hriat a nih thu leh, hei hi a rang thei ang bera CBI-te chhui chian tir an phut thu a sawi. 

NGO chuan sorkarin fund a pekchhuah hi tihchingpen a nih leh nih loh chu Enforcement Directorate chhui tel tir an phut bawk tih an sawi a ni. Sharma chuan an thil phut zingah hian NRC update hna thawk tura officer-te lak an nih dante, technology hman chungchang leh hnathawk tura an chhawr leh chhawnten an hna an thawk ṭha takzet em tih chhui chiante a tel tih a sawi. Sorkar laipui hnenah pawh NRC kalpuina tura sum hman ral zat diktak puangzar tur leh, a hun dik takah sum hman a nih dante chu endik a ni ṭhin em tihte sawichiang turin an phut bawk. APW president chuan, "NRC kalpuina atan hian sum tam tak senral a ni a, hei vang hian uluk taka sum hman dante hi enfiah a ngai a ni," tiin a sawi. 

Assam sorkarin NRC final list a tihchhuahah hian diltu zinga mi nuai 19 chuang zet telh an ni lo. APW chuan state leilung fa ngei list-a telh loh eng emaw zat an awm tih sawiin, sorkar laipui hnenah pawh heng mite hian harsatna an tawh loh a, detention centre-a dah an nih lohna tura hma la turin an phut bawk. Hemi rual hian dan loa lut, Bangladesh mi tam tak list-ah telh an ni thung tih sawiin, hei vang hian list-a awmte finfiah ṭha leh turin an ngen dawn tih Sharma chuan a sawi bawk.