Manipur-ah in18 hal sak

Manipur-a Senapati district-ah Northern Maram People’s Organization (NMPO) leh Eshow Kahena of Makhan-te ram inchuhna bial chhungah nimin zing khan in 18 halsak an ni. 

Makhan Union (MU) chuan thuchhuah siamin, he thil thleng hi an dem tih leh, pawikhawihtute chuan ralthuamte an keng tih an sawi. He pawikhawihna thlenna hmun hi Makhan Khuman leh New Makhan inkara National Highway-2-ah a ni tih sawiin, zing dar 4.30 vela thleng a ni tih an sawi. 

MU chuan, "In ṭhenkhat chu pawn lam aṭangin kalh khum an ni a, an inte hi rawk sakin an hal sak zui bawk a ni," a ti. He thil thleng duh lohna lantirin NH-2-ah nawrh huaihawt an tum thu an puang nghal a, mahse state sorkarin pawikhawihtute hi darkar 72 chhung ngeia manchhuah a tiam avangin nawrh an tum hi an ṭhulh leh rih a ni. 

Pawikhawihna thlenna hmun aṭanga km 2.5 vela chauha hlaa awm, 34th Assam Rifles bakah, police department leh fire department-te engmah ti loa an awm chu MU chuan an dem tih a sawi. Pawikhawihtute chu man chhuak a, na taka hrem ngei an phut thu leh, an in halsakte pawh zángnadawmna ṭha tak pe tura an phut thu an sawi bawk.